أنا مش عاوزة أكون كده ـ Any more ـ يعني عاوزة أكون أنا وبس ، مش ح أخبي فرحي وأكون سعيدة بصورة معقولة
وممكنة لأني ح أفرح وأنطط ع قدر ما أقدر واللي عاوز يقول على عيلة وسخيفة يقول ومش هاممني.
ولما أزعل مش ح أراعي لأي حد ،،ح أزعل زي ما أنا عاوزاني مش ح أراعي لبروتوكولات زعل محددة ، لأني بصراحة
زهجت من كل القيود اللي مكبلاني ومخلياني مش طايقاني.
أنا كنت لما أزعل ببعد من كل الناس أصحابي وأهلي و كلهم علشان ما أجرحهم و أزعلهم بس إكتشفت إني كده بقلقهم علي
أكتر مما هم مقلقين أصلاً.
المهم ..
خلاص عهد الإستبداد والظلم والجور مني علي إنتهى وبدأ عصر جديد عصر الشفافية والوضوح ،، و على فكرة كل
الحاجات اللي كنت بعملها وبطلت أعملها علشان رأي الناس فيها رجعت أعملها من تاني.
رجعت أرسم وأتابع مسلسلات الكرتون و كمان بقيت أسكت كتير أكتر مما أتكلم و بجد أنا فرحانة وسعيدة جداً لأني
رجعـــــــــــــــــت أنـــــــــــــا ..
ليست هناك تعليقات :
إرسال تعليق