خالي الطرف أخيـــــــــــــــــراً

  مساء الورد عشان أنا بـ أمــــــــــــــــــــــوت في الورد ^_^

        طولت جداً ما دونت ظروف المرض وبعدين كان عندي مشاوير مهمة ومرهقة جداً كان لازم أمشيها كل الحاجات دي خلتني أعتزل التدوين مؤقتاً .. بس الحمدلله رجعت أدون من جديد .

       ح أحاول أعمل " Updating " سريع كده أو جرد للشهر و الـ كم يوم اللي عدوا بدون اسهاب يعني اللي ما عنده لازمة مش ح يتكتب..

طيب ..
        أهم حاجة حصلت لي و أغرب حاجة أني نزلة البرد مسكتني لثلاثة أسابيع وشوية كمان!! جربت معاها كل الأدوية الكيميائية والتقليدية والوصفات السرية وكل شيء ممكن بس مفيش فايدة لغاية لما زهجت مني أخلت سبيلي والحمد لله.
        تاني أهم حاجة حصلت وبجد تستاهل حفلة كبيــــــــــــــــــــــــرة أني كملت خدمة وطنية وأمس مشيت طلعت خلو طرف منها """ لأنه موضوع الخدمة ده عامل زي الدين مؤجل السداد لازم لازم يدفع مهما طال الزمن أو قصر """ فرحت جداً وكمان تعبت أكتر لأن الموضوع كان محتاج مشاوير كتيرة تقريباً أسبوع أنا ماشة وراجعة بس الحمد لله خلصـــــــــــــــنا :)

       أما أجمل حاجة حصلت هي أني قابلت " هوبا و هدولا " صاحباتي من أيام الكلية كان يوم جميل جداً راجعنا حاجات كادت تتنسي ومشينا مشاوير مع بعض بجد اتبسطنا مواهب رجعت أمبارح على ربكـ وهديل كمان ح ترجع على سنار " ح أشوفهم تاني كمان مرة بعد ما تتحدد المعاينات بإذن الله .
        في حاجة حصلت بس ما عارفة أصنفها ضمن أي قائمة أنا ح أقول حصل شنو و كل يصنف على مزاجه ....!! هو في شخص زعلني منه جداً جداً وغلط في حقي جامد الكلام ده من 8 شهور وطيلة المدة دي ما حاول يعتذر أو يتأسف ناو رجع عاوزني ارجع معاه زي ما كنا زمان .. المفروض أكون رديت عليه بس أنا لسة بـ أقلب الكلام في رأسي ونشوف ح يحصل شنو؟

  ده كان حصيلة الشهر اللي فات باختصار ...